من اروع المواضيع التى كتبت فى عشق الزمالك للزملكاوية اميرة

بسم الله الرحمن الرحيم

***************************

الحب قدر قبل أن يكون اختيار ,فإن لم تختار فلا تحزن وإعلم أن قدرك اّتى لا محالة , وإعلم أن القدر أحيانا يكون أجمل وأفضل من مليون اختيار

فالقدر بيد الله سبحانه وتعالى ومما لا شك فيه أن ما يختاره الله لنا هو أفضل واْجمل كثيرا مما نختاره نحن لأنفسنا لذا فلا تظن يوما أن الحياة قد انتهت على حلم ضائع أو اْمنية فائتة أو اختيار لم يتحقق ! لاْن الله عز وجل أعلّم بنا من أنفسنا و أعلّم بالغيب وتذكر جيدا أن الله طيب لا يقبل الا طيبا ...

لذا فلا تظن يوما إن ضاعت منك فرصة أنها نهاية المطاف أو اّخر الحكاية ولكن إعلم أنك فى انتظار الفرصة الاْجمل وأن الله يخبىء لك الاْفضل , وأن ما عند الله هو الاْجمل , فلا تحزن , بل استعد لانتظار هديتك من المولى عز وجل

إذن فلا تظلم قدرك أو تتجنى عليه , ولا تظن أن اختيارك سيقدم لك الدنيا على طبق من ذهب !

فإن لم تختار الحب وذهب إليك متطوعا فاْعلم أن قدرك أفضل كثيرا من اختيار مؤجل لم يأتى بعد والله أعلم متى سيأتى لذا فالأفضل أن تتمسك بقدرك وتتشبث به , أما لو كان قدرك هو نفسه اختيارك فإعلم أن الله عز وجل أراد أن يكافئك مكافئة لابد أن تقدرها وتعرف قيمتها جيدا لإنها لا تاْتى لا للمحظوظين

واْنا فى حب الزمالك أعتبر نفسى من المحظوظين الذى أراد الله أن يكافئهم باْن يكون قدرهم هو نفسه اختيارهم.

فالزمالك بالنسبة لى ليس مجرد نادى أشجعه بل هو قدرى الذى اخترته بنفسى وبكامل إرادتى كى أسعد به ويسعد بى , الزمالك بالنسبة لى وطن كبير يحتوينى ويحتوى كل عاشقيه, نادى اْشعر معه بالاْمان ,أشعر معه بكل المعانى الجميلة , نادى أفتخر بحبه وبعشقه , وأشعر بسعادة غامرة بإنى من ضمن عاشقيه ومحبيه , واْسعد كثيرا بترديدى كلمة ::: بحبك يا زمالك

♥♥♥♥♥♥♥♥♥♥♥♥♥♥♥♥♥♥♥♥♥♥♥♥

بحبك يا زمالك

♥♥♥♥♥♥♥♥♥♥♥♥♥♥♥♥♥♥♥♥♥♥♥♥

** وفى زمن زى زمنا ده مبقاش سهل إننا نلاقى حد نتسند عليه , حد يحس بينا ونحس بيه ,حد يشاركنا همومنا ونشاركه همومه , حد يفرح بينا ونفرح بيه وليه , حد يحتوينا وإحنا نحتويه ,حد نحس إنه لينا وإن إحنا بس ليه , حد نشيله فى عيوننا ويشيلنا جوه عينيه , حد نحس معاه بالأمان , وبكل المعانى الجميلة اللى افتقدناها فى حياتنا من حب وصدق وخير وطيبة وحنان , حد ينفع يبقى صديق فى زمن ندرت فيه الاْصدقاء !! وأصبح الصديق عن حق كالعملة النادرة يصعب إيجادها ! بالفعل يصعب إيجادها فى زمن إختفت فيه كلمة صداقة واْصبح صديقك هو القرش وصاحبتك هى المصلحة وزميلك هو حالك , فى زمن اختفت فيه معانى جميلة كثيرة ! ما بنصدق إننا نلاقى حد بالمواصفات اللى فوق دى لإن من النادر إننا نلاقيها أصلا, ولو لقيناها يبقى لازم نتمسك بيها ومنسيبهاش لإن الفرصة لو راحت يبقى عمرها ما هتتعوض تانى ولا هترجع تانى للاسف !!

وبما إنى بقدس حب الأشياء وبشوف إنها فى أوقات كتيرة بتبقى اْوفى وأخلص كتير من بنى اّدمين كتير بنعاشرهم وبنتعامل معاهم ! بشوفهم عمرهم ما هيغدروا بيا أو يخونوننى فى يوم من الاْيام , أو ممكن يصاحبونى علشان مصلحة ما وأول ما المصلحة تخلص ما أشوفش وشهم تانى !! علشان كده اخترت قدرى إنه يبقى صديقى

إخترت الزمالك لإنه فيه كل المواصفات دى وأكتر كمان , اخترت حب الزمالك لإنه أعمق وأجمل من حب أى حاجة تانية , اخترت الزمالك كصديق لإنى لو لفيت الكون كله عمرى ما هلاقى صديق زى نادى الزمالك , عمرى ما هلاقى حد يعيشنى الحالة اللى بعيشها مع نادى الزمالك , الزمالك بالنسبة ليا مش مجرد نادى بشجعه اْو فريق كورة يكسب أو يخسر ! وطبعا مش نتيجة ماتش اْو حتى عشرة اللى هتفرق معايا فى حبى للزمالك أو تقلل منه !

الزمالك بالنسبة ليا وطن بيضلل عليا , وطن بشوف فيه كل اللى نفسى فيه , وطن أحب أشارك فيه وأحب اكون إيجابية علشانه, وطن بحبه بكل ما فيه بسلبيات قبل إيجابياته

الزمالك بالنسبة ليا هو حالة حب , حالة بتعلم منها كل يوم حاجات مفيدة ومعانى جميلة , إتعلمت منه إزاى أفرح , وإزاى اْحب , وإزاى اْصبر , وإزاى أحزن , وإزاى أخلص للى بحبهم , إتعلمت منه يعنى إيه وفاء ؟, يعنى إيه إخلاص ؟, إتعلمت منه إن الصديق هو اللى بيدوم وقت الشدة , إتعلمت منه إن الحب مش مجرد كلام ولكنه فعل ومواقف

إتعلمت منه إزاى حتى لو إتظلمت إنى ما استسلمش وأفضل صامدة , إتعلمت منه إزاى استحمل قسوة غيرى عليا وأفضل برده أنا الاْكرم .

فعلا حالة غريبة وجميلة هى حالة العاشق الزمالكاوى بينه وبين ناديه , حالة يصعب وصفها أو حتى تجسيدها , مع الزمالك بعرف معنى الفرحة الطبيعية , بعرف إزاى أدى كل حاجة حقها وحجمها , بعرف إزاى أفرح وإزاى أعيش مبسوطة , إزاى الحاجة حتى لو بسيطة لكن حلوة وحصلت للنادى بعرف أفرح لها وأنبسط علشانها , وعلى فكرة ده مش شىء تافه أو بسيط إننا نعرف نفرح أو ننبسط من أقل حاجة لإن فى ناس بتعيش عمرها كله من غير ما تعرف إزاى تفرح أو تنبسط علشان كده مينفعش إننا نضيع من نفسنا أى لحظة ممكن نحس فيها بطعم الفرحة أو نتمتع بيها

ومنكرش إن الفترة الطويلة اللى قضاها الزمالك فى مشاكل وصراعات كان سبب من أسباب إننا نتعلم إزاى إننا نقّدر قيمة الفرحة بجد , وإننا نعرف يعنى إيه فرحة وإزاى نتمسك بيها ونعرف نعيش عليها وبيها , إتعلمنا إن الفرحة شىء جميل مينفعش نفوتها أو نضيعها حتى لو على حاجة بسيطة , لازم ندى كل حاجة حقها علشان زى ما كنا بنزعل لازم برده نعوض حزننا اللى فات فى فرحتنا الجاية بإذن الله

إتعلمت مع الزمالك إزاى أصبر وأستحمل , إزاى إن مهما الدنيا شدت عليا وقفلت أبوابها عليا ولكن الفرج قادم لا محالة فى يوم من الاْيام , وإن الدنيا أكيد هتضحكلى وهتعوضنى عن كل اللى فاتنى , اتعلمت إنى مياْسش وإن الحياة عاوزه اللى يعيشها على عيوبها علشان زى ما بيتمتع بطعم الفرحة أكيد هياّسى وهيدوق مرارة الحزن

إتعلمت من الزمالك إن الحزن أسمى معانى الحب إتعلمت إزاى أشارك الناس اللى بحبهم حزنهم وفرحهم إزاى أفرح لفرحه وأزعل لزعله وأزعل عليه

مع الزمالك الدنيا بتبقى غير , الدنيا بتبقى جميلة حتى لو مئاسيها ومشاكلها كتيرة , مع الزمالك بنسى الحاجات اللى مزعلانى ومش بفكر غير فى اللى الحاجات اللى مزعلاه هوه وفى الحاجات اللى بتفرحه علشان أفرح ليه وبيه .

فى أى وقت بكون متضايقة فيه أو زعلانة بلاقى نفسى تلقائيا بتكلم عنه علشان أفرح وأنسى همومى , بلاقى نفسى جريت أتابع أخباره حتى لو مش كويسة بس مجرد إنى بشاركه اْخباره فده شىء بيفرحنى وبيسعدنى , بلاقى نفسى بقلب فى اْهدافه اللى عندى وبتفرج عليه علشان أنبسط , بلاقى نفسى بضحك وقلبى بيتحرك أول ما بشوف الفانلة البيضاء بخطين حمر

مع الزمالك بعرف أعيش بجد , بعرف أفرح , بعرف أزعل , بعرف أعيش الدنيا اللى أنا نفسى بجد إنى أعيشها ,بفرح واْنا بعترف بحبى وعشقى للزمالك , بفرح وهو موجود قصادى بتكلم عنه وبتابعه , بفخر إنى زمالكاوية وبفتخر بزمالكويتى

الزمالك بالنسبة ليا حاجة كبيرة جدا ,عشق لا ينتهى ,حب بجد , حاجة كده من الزمن الجميل محتفظة بيها ولا يمكن اْستغنى عنها ,لما ببقى زعلانة بتابعه واْتكلم عنه علشان اْحس إن لسه الدنيا بخير , اْنا بعامل الزمالك على إنه بنى اّدم قدامى بحبه وبخلصله, بزعل على زعله عمرى فى يوم ما زعلت منه وبفرح لفرحه واْتمنى إنه يدوم علشان اْشوفه دايما فرحان , بيصعب عليا لما بشوف الناس بتظلمه اْو بتوقعه فى مشاكل ببقى نفسى اْعمله اْى حاجة تخلصه من المشاكل لكن مفيش فى إيديا حاجة غير إنى أحبه واشجعه وأتابعه لان مش فى إيديا القرارات علشان أخلصه من اْى مشكلة يقابلها !
بحب الزمالك دايما يكون حواليا , نفسى اْشوفه دايما فى اْفضل حال ,الزمالك بالنسبة ليا مثال للحب بجد , مثال للاخلاص والوفاء , مثال للجمال , دايما فى عينى بشوفه إنه الأفضل والاْجمل , الزمالك عندى حالة خاصة ,بحبه بجد بحسه جزء من حياتى , بحبه يشاركنى حياتى وأشاركه حياته , بحب إنه يكون متواجد معايا فى الحياة , بتابعه فى كل وقت وبشجعه فى الحزن قبل الفرح ,فى الضراء قبل السراء لان هو ده الحب الحقيقى إنك تساند اللى بتحبه فى وقت الشدة ومهما كانت ظروفه لإننا مش كل الناس اللى بنحبها فى حياتنا بنحبها علشان هى اْحسن ناس فى الدنيا ومش لازم يكونوا اْحسن ناس أصلا , ولكن بنحبهم علشان هما اْحسن ناس فى عيوننا ,واْنا الزمالك عندى اْفضل نادى واْحسن نادى فى الدنيا ,اْنا بشوفه كده عينى مش بتشوفه غير كده دايما بشوفه عظيم وجميل ويستحق اْفضل شىء واْفضل مكانة , مهما حصل له من مشاكل اْو إخفاقات عمر ده ما بياْثر فى عشقى له وحبى له وكل زعلى بيبقى زعل عليه , عمره ما كان زعل منه اْنا بزعل عليه لإنه يستحق الاْفضل دايما عمره ما كان يستحق كده ,بزعل لإنى ممكن اْكون كمحبة له مقصرة فى حقه ,بنجرح وبزعل علشان عليه مش منه اْو بسببه ,اْنا تشجيع الزمالك بالنسبة ليا فخر لا يضاهيه اْى فخر وشرف كبير بتشرف بيه سواء كان فى المركز الاْول اْو حتى فى الاْخير , بتشرف بيه سواء مستقر اْو مليان بالمشاكل , بحب النادى ده كده كله على بعضه بسلبياته قبل ايجابياته , بحزنه قبل فرحه
بحب الزمالك لإنه الزمالك ,بحبه مهما كان بشره قبل خيره ,شايفاه وعارفاه وعارفه عيوبه وعارفه مميزاته إختارته واْنا عارفاه وإنتميت له ومبسوطة بإنى من عشاقه ومحبيه مهما كانت ظروفه اْو العقبات والمشاكل اللى بتقابله برده هفضل منتمية له وبحبه وبعشقه وفخورة بيه , وده كله لسبب بسيط لإنى بحب الزمالك
و حبى له ده قدر قبل ما يكون إختيار , ويمكن اْنا اْكتر فترة إتعلقت بالزمالك فيها اْكتر هى اّخر اْربع سنين ,وهى الفترة اللى عانى فيها الزمالك من مشاكل وإخفاقات وصراعات كتيرة ,فى الفترة ديه إتعلقت بالنادى اْكتر وكان كل ما تواجهه مشكلة حبى ليه يزيد اْكتر واْتعلق بيه اْكتر , واْتمسك بحبى له أكتر لإن هو ده الحب الحقيقى , الحب اللى بجد إنك تساند اللى بتحبه فى وقت الشدة , تسانده فى حزنه , لإنه فى ساعة الضيق بيبقى محتاج اللى يقف جمبه بجد , واْنا مشاكل الزمالك بتزيدنى عشقا فيه وحبا له
فعلا اْنا واخده الزمالك كده بحبه كده زى ما هو بكل ما فيه من مشاكل وبكل ما فيه من حاجات حلوة ,بفرح لفرحه واْزعل لزعله , بحبه ببطولاته , بتاريخه الكبير , بحبه ككيان عظيم إتحمل كتير وما زال حتى الاّن صامد وبيتحمل كتير ,ولسه واقف على حيله إتظلم كتير و إتحمل كتير ولسه صامد كنادى كبير عظيم ,بحب الزمالك لإنه على طبيعته مش محتاج إنه يتجمل اْو يتصنع , دايما واضح للجميع سلبياته بتظهر قبل إيجابياته , بحبه لانه قدرى اللى إخترته بنفسى , إخترت إنى أحب النادى ده واْسانده واْشجعه واْفضل وراه, إخترت إنى أتابعه وأحب أشوفه ,أتفرج عليه فى كل الاْلعاب وفى كل البطولات لإنى مش مشجعة كرة قدم فقط ولكنى محبة وعاشقة للنادى ده بكل ما فيه , سعادتى بتسعدنى , فرحته بتفرحنى متعته بتمتعنى , أى حاجة حلوة بتحصل له كإنها بتحصللى أنا ,بحبه وهفضل أحبه لإنه الزمالك وده عندى كافى جدا ,معاه للنهاية وبحبه كده كله على بعضه لإنه بالفعل قدرى إنى اْنتمى للزمالك,واْنا راضية بقدرى ومستمتعة بيه ومعنديش أى إستعداد إنى اْتخلى عنه فى اْى وقت من الاْوقات , معاه وهفضل معاه إن شاء الله فى المحنة قبل الفرحة ,لإنه ببساطة ملك على عرش قلبى وعلى قلوب كل الزمالكوية ......

الزمالك عشق لا ينتهى

♥♥♥♥♥♥♥♥♥♥♥♥♥♥♥♥♥♥♥♥♥♥♥♥

كل سنة وإنت طيب يا ..... زمالك ......